was successfully added to your cart.

Cart

News

E promé tres studiantenan a finalisá e kurso di Integridat Básiko na LWI su School of Integrity

By December 21, 2020 No Comments

Willemstad, 20 di desèmber 2020 – Fundashon Leading with Integrity (LWI) a entregá sertifikado
n’e promé tres studiantenan kende a gradua na su School of Integrity. Entrega di e sertifikadonan a
tuma lugá dia 19 di desèmber último durante un seremonia ameno na WTC. Riba e potrèt por mira
d.r.p.d. dosente Nelson Foendoe, Dr. Marlon Winedt, e studiantenan Amourette Fox, Dynette
Maria, kende ta e ‘best geslaagde’, Louella van Blarcum i Minister di BPD, Armin Konket.
Durante e seremonia, minister Konket a hiba palabra i a elogiá e inisiativa di LWI pa lanta un skol di
integridat, kual ta kuadra masha bon ku e maneho di gobièrnu relatá na Büró di Integridat. Na su
turno, Dr. Marlon Winedt tambe a duna un diskurso kòrtiku den kual el a enfatisá ku integridat ta
masha importante pa protehá nos komunidat kontra inhustisia i ku ademas integridat ta hiba na un
mihó komportashon i prestashon en general, tantu den trabou komo den bida personal.
Fundashon LWI ta un organisashon non-profit ku ya pa 6 aña tin e meta di eduká lidernan den
komunidat den e área di integridat, pa nan por inspirá nan siguidónan pa biba un bida íntegro. LWI
ta enfoká riba e integridat di paden (integridat intrínsiko), enfatisando moralidat eksplísitamente.
“Nos ta mashá kontentu i orguyoso di nos studiantenan kende a finalisá ku éksito e kurso di
Integridat Básiko na nos Skol di Integridat”, asina Nelson Foendoe, presidente di LWI a bisa. “Nan
tur tabatin masha interes p’é tema di integridat i kera siña mas, kual ta netamente loke e kurso akí
ta ofresé. Nos ta satisfecho ku nan a duna un bon prestashon, i nos ta spera ku den futuro nan lo
sigui e kurso di Integridat Avansá tambe.”
Kurso di integridat
E kurso di Integridat Básiko a dura ocho siman i e lèsnan a ser duná na un manera interaktivo den
grupo chikitu. Komo parti di e kurso kada studiante mester a skirbi un tésis tambe na final.
Pa medio di e kursonan akí, LWI ke duna su aporte na nos komunidat, konsiderando e nesesidat pa
mas integridat den nos pais. E siguiente kurso di Integridat Básiko lo kuminsá na mart 2021, i e
kurso di Integridat Avansá ta kuminsá na luna di ougùstùs 2021. E idioma di instrukshon lo ta
Papiamentu. Hulandes òf Ingles tambe ta posibel, si tin interes di mímimo 10 persona.
Kosto i inskripshon
Kosto di kada kurso ta ANG 435, ku ta inkluí gastu di material di estudio (buki). Tin posibilidat tambe
pa drenta areglo di pago. Pa inskripshon, por bai riba wèpsait www.lwi-foundation.org/soi. Pa
haña kontesta riba kualke pregunta, por tuma kontakto ku LWI via email (info@lwi-foundation.org)
òf yama na tel. 516-9747 òf 789-3098.

Leave a Reply