Aki nos ta presentá e kansion nobo di amor di Shelomi Doran Bakhuis titulá “Huntu ku bo”
- Komposishon: Shelomi Doran – Bakhuis
- Produkshon Musikal: Reuben van Lierop
- Productor Vokal: Tamara Nivillac
- Mix & Mastering: Jamz Productions
- Music Video riba Youtube
Storia tras di e kansion
Huntu ku bo
E kansion “Huntu ku bo” ta un kansion di amor den un tempu difísil i di hopi kambio. Dikon?
Famianan ku a pasa den e temporada di karentena òf shelter na kas ku nan famia, por a eksperensiá e goso di ta huntu i alabes momentunan di konflikto.
Shelly ta splika ku den e temporada aki mas ku nunka komo kantante el a eksperensiá e poder di disidí di stima su esposo i enfrentá e tempu aki huntu.
Durante e tempu aki riba 8 di aprel nan a selebrá nan di 3 aniversario matrimonial. Nan por a para ketu i reflekshoná riba e 3 añanan tras di lomba i Shelly ta splika ku el a realisá e balor di su kasá i e goso di por logra den bida huntu. Ta netamente den e tempu difísil aki nan a afirmá nan eskoho pa stima otro i pasa den e tempu aki huntu.
Shelly ta ekspresá lo siguiente:
“Lockdown” por produsí mas amor, mas konsientisashon di e propósito di e matrimonio i famia i kreatividat pa por pasa henter un dia huntu.
Mi ta imaginá mi ku parehanan en general lo mester tabata kreativo den e tempu aki pa por a sigui ekspresá amor un na otro”. I asina e kansion aki a nase. Mi a risibí e inspirashon i a disidí di skibié mes ora.
Inkluso mi a para ketu i pensa riba esnan ku tòg mester a bai traha lagando nan kasá na kas. Kon den e temporada ei i despues, nan por keda mantené e kandela di amor sendé.
Mas ku nunka Kòrsou tin mester di matrimonionan fuerte ku ta disidí di lucha huntu pa bienestar di e komunidat. I alabes gosa di otro.
Esaki ta un kansion di amor pa inspirá tambe esnan ku no a kasa ainda pa mira e bunitesa di matrimonio i e propósito di esaki.
P’esei pa e video clip a skohe diferente pareha kasá tantu hóben komo adulto pa ekspresá den baile òf na kualke otro forma, kon nan ta disfrutá di otro den ambiente di nan hogar.
E kansion aki ta un ekspreshon di e propósito di amor
Mi ta dedik’é na mi esposo Rudienne Doran i na tur pareha kasá.
Tin kosnan bunita komo resultado di e asina yamá “lockdown”
Laga nos amor ta un inspirashon pa e nashon.
Laga nos tuma e desishon di stima i keda HUNTU.
