News

Korsou ta proklamá Un Komienso Nobo pa Kòrsou na Brionplein

By December 27, 2019 No Comments

Instituto Embahador di Reino pa di 3 aña konsekutivo ta organisá un alabansa i adorashon na Dios riba Brionplein riba e promé djabièrè di e promé luna di aña 2020. Huntu ku pueblo di Kòrsou riba dia 3 di yanüari 2020 di 6’or pa 9’or di anochi Instituto Embahador di Reino lo proklamá un komienso nobo pa Kòrsou den un anochi di kanto, baile i orashon ku gradisimentu na Dios. Nos ta gradisi Dios pa un ambiente nobo, un pensamentu nobo, relashonnan nobo i un Kòrsou nobo.  

E meta prinsipal di alabansa ta pa invoká e presensia di Dios den nos medio ambiente. Den presensia di Dios ta imposibel pa tur kos keda meskos. Tur kos ta kambia drastikamente pa bon i pa e gloria di Dios.

Na yanüari 2018 nos a proklamá ku mester tin un kambio drástiko pa por trese desaroyo ekonómiko na Kòrsou. Na yanüari 2019 nos a proklamá ku Pasobra E ta Dios nos ta kere ku E tin plannan pa pas i no pa kalamidat, pa duna nos un speransa i un futuro. Na yanüari 2020 nos ta proklamá Un Komienso Nobo. Pasobra E ta Dios nos ta gradisiE pa un ambiente nobo, un pensamentu nobo, relashonnan nobo, pa un Kòrsou nobo.

Presensia di Dios ta trese goso

Presensia di Dios ta duna sosiego

Presensia di Dios ta trese pas

Presensia di Dios ta atrae e hendenan korekto pa inverti den nos pais

Presensia di Dios ta trese bendishon

Presensia di Dios ta trese poder

Presensia di Dios ta trese sabiduria i vishon

Presensia di Dios ta kontesta pa tur nos nesesidat

Instituto Embahador di Reino ta sigui ku e alabansa i adorashon aki henter aña, kada promé djabièrnè di luna di 6’or pa 9’or anochi riba Brionplein. Segun ku nos ta alaba Dios e kambionan ta bira visibel.

Pa mas informashon por fabor tuma kontakto ku nos na telefòn i app +599 9 521 6736 òf +599 9 675 2695. Por manda email tambe na info@embahadordireino.org.

Thyrone Magloire

Presidente di Instituto Embahador di Reino