News

Christafari a kulminá su bishitá na Kòrsou ku un konsierto eksepshonal “Christafari Live in Curaçao”

By December 16, 2019 No Comments

Willemstad– Djabièrnè último Christafari a duna un konsierto impaktante aki na Kòrsou. E konsierto a konta ku asistensia masal di e públiko ku a alabá i adorá Dios huntu ku e banda aki ku ta mundialmente konosí pa nan músika di reggae i nan amor pa kompartí e mensahe di Hesu-Kristu na tur nashon.

E públiko a risibí Christafari ku hopi entusiasmo i e banda a interaktuá hopi tremendo ku e públiko durante e konsierto aki, asta e muchanan presente tabatin un momentu ku nan por a subi ensenario i baila huntu ku e banda aki. Christafari ta un banda hopi spesial ku ta ofresé konsiertonan grátis rònt mundu kubriendo nan mes gastunan pa por alkansá tur nashon pa Kristu. Nan lema ta “Reaching the lost at any cost”.

Iglesia House of Worship Kòrsou i Iglesia Bida Nobo Rio Canario a uni ku Christafari pa hasi e siman aki posibel kaminda un kantidat di 4 aktividat a keda organisá. Durante nan estadia aki na Kòrsou Christafari a kompartí nan talento i eksperensia den 7 diferente tayer grátis duná pa e integrantenan di e banda mes. Tayernan ku a keda duná ta entre otro kanto, baile, perkushon i liderazgo. Esaki tabata un oportunidat grandi i úniko pa Kòrsou, spesialmente pa e hóbennan por a haña un tayer grátis riba nivel internashonal.

Banda di esaki Christafari a ofresé un konsierto na Sentro di Detenshon i Koreshon Kòrsou ku tabata di gran bendishon pa tur e klientenan di e sentro. Den e konsierto aki nan a kompartí nan testimonio i e mensahe di speransa den Kristu Hesus. Dor di e impakto di e mensahe aki hopi di esnan den e sentro aki a tuma un desishon pa risibí Hesus den nan kurason. Nos ta sigur ku algu nobo a kuminsá den kada un di nan su bida.

Durante e siman aki tambe Christafari a duna un konsierto spesial na muchanan di diferente skol aki na Kòrsou. Den e konsierto spesial pa mucha aki nos por a mira kon e muchanan a baila i disfrutá imensamente den e presensia di Dios i di e presentashon di Christafari. Na final hopi mucha a tuma un desishon pa sigui Hesus.

Nos ta gradisido na Dios ku a skohe un pais chikí manera Kòrsou pa presensiá algu di e magnitut aki. Nos ta konfia ku e simia di e Palabra di Dios ku a keda sembrá durante di e siman aki lo krese i impaktá e pueblo di Kòrsou ku e positivismo ku tantu nos tin mester di dje.

Prizon

Leave a Reply